10. Mihr Yasht

Based on edition of Karl F. Geldner, Avesta, the Sacred Books of the Parsis, Stuttgart, 1896.

0.

(pa nãm i ýazdã, hôrmezd i hvadâe i awazûnî gurz hvarahe awazâyât,
mihir i frâgayôt i dâwar i râst bê rasât,
ezh hamâ gunâh ... pa patit hôm!)
xshnaothra ahurahe mazdå, tarôidîti angrahe mainyêush, haithyâvarshtãm hyat vasnâ ferashôtemem. staomî ashem,
ashem vohû...(3).
fravarâne mazdayasnô zarathushtrish vîdaêvô ahura-tkaêshô,

(Here recite the appropriate Gah dedication.)

mithrahe vouru-gaoyaoitôish râmanasca hvâstrahe
xshnaothra ýasnâica vahmâica xshnaothrâica frasastayaêca,
ýathâ ahû vairyô zaotâ frâ-mê mrûtê,
athâ ratush ashâtcît haca frâ ashava vîdhvå mraotû!

1.

mraot ahurô mazdå spitamâi zarathushtrâi, âat ýat mithrem ýim vouru-gaoyaoitîm frâdadhãm azem spitama âat dim dadhãm avåñtem ýesnyata avåñtem vahmyata ýatha mãmcit ýim ahurem mazdãm.

2.

mereñcaite vîspãm dainghaom
mairyô mithrô-druxsh spitama,
ýatha satem kayadhanãm
avavat ashava-jacit,
mithrem mâ janyå spitama
mâ ýim drvatat peresånghe
mâ ýim hvâdaênât ashaonat,
vayå zî asti mithrô
drvataêca ashaonaêca.

3.

âsu-aspîm dadhâiti mithrô ýô vouru- gaoyaoitish ýôi mithrem nôit aiwi-druzhiñti, razishtem pañtãm dadhâiti âtarsh mazdå ahurahe ýôi mithrem nôit aiwi-druzhiñti, ashaonãm vanguhîsh sûrå speñtå fravashayô dadhâiti âsnãm frazaiñtîm ýôi mithrem nôit aiwi-druzhiñti.

4.

ahe raya hvarenanghaca
tem ýazâi surunvata ýasna mithrem vouru-gaoyaoitîm zaothrâbyô, mithrem vouru-gaoyaoitîm ýazamaide râma-shayanem hushayanem airyâbyô dainghubyô.

5.

âca-nô jamyât avanghe
âca-nô jamyât ravanghe
âca-nô jamyât rafnanghe
âca-nô jamyât marzhdikâi
âca-nô jamyât baêshazâi
âca-nô jamyât verethrakhnâi
âca-nô jamyât havanghâi
âca-nô jamyât ashavastâi
ukhrô aiwithûrô ýasnyô
vahmyô anaiwidruxtô
vîspemâi anguhe astvaite
mithrô ýô vouru-gaoyaoitish.

6.

tem amavañtem ýazatem
sûrem dâmôhu sevishtem
mithrem ýazâi zaothrâbyô,
tem pairi-jasâi vañtaca nemanghaca
tem ýazâi surunvata ýasna mithrem vouru-gaoyaoitîm zaothrâbyô, mithrem vouru-gaoyaoitîm ýazamaide
haomayô gava baresmana, hizvô danghangha mãthraca, vacaca shyaothnaca zaothrâbyasca, arshuxdhaêibyasca vâkhzhibyô.
ýenghê hâtãm âat ýesnê paitî vanghô mazdå ahurô vaêthâ ashât hacâ ýånghãmcâ tãscâ tåscâ ýazamaide!

7.

mithrem vouru-gaoyaoitîm ýazamaide
arsh-vacanghem vyâxanem
hazangra-gaoshem hutâshtem
baêvare-cashmanem berezañtem
perethu-vaêdhayanem sûrem
ahvafnem jakhâurvånghem.

8.

ýim ýazeñte dainghupatayô
arezahe ava-jaseñtô
avi haênayå xrvishyeitîsh
avi hãm-ýañta rasmaoyô
añtare dainghu pâperetâne.

9.

ýatâra vâ-dim paurva frâyazâiti
fraoret fraxshni avi manô
zarazdâtôit anguhyat haca
âtarathra fraorisyeiti
mithrô ýô vouru-gaoyaoitish
hathra vâta verethrâjanô
hathra dâmôish upamanô.
ahe raya ... tåscâ ýazamaide!

10.

mithrem vouru-gaoyaoitîm ... jakhaurvånghem.

11.

ýim ýazeñte rathaêshtârô
bareshaêshu paiti aspanãm
zâvare jaidhyañtô hitaêibyô
drvatâtem tanubyô
pouru-spaxshtîm tbishyañtãm
paiti-jaitîm dushmainyunãm
hathrâ-nivâitîm hamerethanãm
aurvathanãm tbishyañtãm.
ahe raya ... tåscâ ýazamaide!

12.

mithrem vouru-gaoyaoitîm ... jakhaurvånghem

13.

ýô paoiryô mainyavô ýazatô
tarô harãm âsnaoiti
paurva-naêmât ameshahe
hû ýat aurvat-aspahe,
ýô paoiryô zaranyô-pîsô
srîrå bareshnava gerewnâiti
adhât vîspem âdidhâiti
airyô-shayanem sevishtô,

14.

ýahmya sâstârô aurva
paoirish îrå râzayeñte
ýahmya garayô berezañtô
pouru-vâstrånghô âfeñtô
thâtairô gave frâdhayeñte
ýahmya jafra varayô
urvâpånghô hishteñte
ýahmya âpô nâvayå
perethwish xshaodhangha thwaxsheñte
âishatem pourutemca mourum hârôyum
gaomca suxdhem hvâirizemca

15.

avi arezahi savahi avi fradadhafshu vîdadhafshu avi vouru-bareshti vouru-jareshti avi imat karshvare ýat hvanirathem bâmîm gavashayanem
gavashitîmca baêshazyãm
mithrô sûrô âdidhâiti.

16.

ýô vîspâhu karshvôhu mainyavô ýazatô vazaite hvarenô-då ýô vîspâhu karshvôhu mainyavô ýazatô vazaite xshathrô-då,
aêshãm gûnaoti verethrakhnem
ýôi dim dahma vîdush-asha
zaothrâbyô frâyazeñte.
ahe raya ... tåscâ ýazamaide!

17.

mithrem vouru-gaoyaoitîm ... jakhaurvånghem,
ýô nôit kahmâi aiwi-draoxdhô nôit nmânahe nmânô-patêe nôit vîsô vîspatêe nôit zañtêush zañtupatêe nôit dainghêush dainghupatêe.

18.

ýezi vâ-dim aiwi-druzhaiti nmânahe vâ nmânô-paitish vîsô vâ vîspaitish zañtêush vâ zañtupaitish dainghêush vâ dainghupaitish
frasha upa-scañdayeiti
mithrô grañtô upa-tbishtô
uta nmânem uta vîsem
uta zañtûm uta dah'yûm uta nmânanãm nmânô-paitish uta vîsãm vîspaitish uta zañtunãm zañtupaitish uta dah'yunãm dainghupaitish uta dah'yunãm fratemadhâtô.

19.

ahmâi naêmâi uzjasâiti
mithrô grañtô upa-tbishtô
ýahmâi naêmanãm mithrô-druxsh
naêdha mainyu paiti-pâite.

20.

aspacit ýôi mithrô-drujãm
vazyãstra bavaiñti
taciñtô nôit apayeiñti
bareñtô nôit frastanvañti
vazeñtô nôit framanyeñti,
apashi vazaite arshtish
ýãm anghayeiti avi-mithrish
frêna akhanãm mãthranãm
ýå verezyeiti avi-mithrish.

21.

ýatcit hvastem anghayeiti
ýatcit tanûm apayeiti
atcit dim nôit râshayeñte
frêna akhanãm mãthranãm
ýå verezyeiti avi-mithrish,
vâtô tãm arshtîm baraiti
ýãm anghayeiti avi-mithrish
frêna akhanãm mãthranãm
ýå verezyeiti avi-mithrish.
ahe raya ... tåscâ ýazamaide!

22.

mithrem vouru-gaoyaoitîm ... jakhaurvånghem
ýô narem anaiwi-druxtô
apa ãzanghat baraiti
apa ithyajanghat baraiti.

23.

apa-nô haca ãzanghat
apa haca ãzanghibyô
mithra barôish anâdruxtô, tûm ana mithrô-drujãm mashyânãm avi hvaêpaithyåse tanvô thwyãm ava-barahi, apa aêshãm bâzvå aojô tûm grañtô xshayamnô barahi apa pâdhayå zâvare apa cashmanå sûkem apa gaoshayå sraoma.

24.

nôit dim arshtôish huxshnutayå
nôit ishaosh para-pathwatô
ava-ashnaoiti shanmaoyô
ýahmâi fraxshni avi manô
mithrô jasaiti avainghe
ýô baêvare-spasanô sûrô
vîspô-vîdhvå adhaoyamnô.
ahe raya ... tåscâ ýazamaide!

25.

mithrem vouru-gaoyaoitîm ... jakhaurvånghem
ahurem gufrem amavañtem
dâtô-saokem vyâxanem
vahmô-señdanghem berezañtem
ashahunarem tanumãthrem
bâzush-aojanghem rathaêshtãm

26.

kameredhô-janem daêvanãm
akatarem sraoshyanãm
acaêtârem mithrô-drujãm mashyânãm
hamaêstârem pairikanãm
ýô dainghaom anâdruxtô
uparâi amâi dadhâiti
ýô dainghaom anâdruxtô
uparâi verethrâi dadhâiti,

27.

ýô dainghêush rãxshyãithyå
para razishtå baraiti
paiti hvarenå vârayeiti
apa verethrakhnem baraiti
avarethå hîsh apivaiti
baêvare khenãnå nisirinaoiti
ýô baêvare-spasanô sûrô
vîspô-vîdhvå adhaoyamnô.
ahe raya ... tåscâ ýazamaide!

28.

mithrem vouru-gaoyaoitîm ... jakhaurvånghem
ýô stunå vîdhârayeiti
berezimitahe nmânahe
stawrå ãithyå kerenaoiti,
âat ahmâi nmânâi dadhâiti
gêushca vãthwa vîranãmca
ýahva xshnûtô bavaiti,
upa anyå sciñdayeiti
ýâhva tbishtô bavaiti.

29.

tûm akô vahishtasca
mithra ahi dainghubyô
tûm akô vahishtasca
mithra ahi mashyâkaêibyô,
tûm âxshtôish anâxshtôishca
mithra xshayehe dah'yunãm.

30.

tûm sraogenå sraorathå nishtaretô-spayå nidhâtô-barezishtå
nmânå masitå dadhâhi
tûm sraogenem sraorathem nishtaretô-aspaêm nidhâtô-barezishtem
nmânem dadhâhi berezimitem
ýase-thwâ aoxtô-nâmana ýasna
rathwya vaca ýazaite
barô-zaothrô ashava.

31.

aoxtô-nâmana thwâ ýasna
rathwya vaca sûra
mithra ýazâi zaothrâbyô,
aoxtô-nâmana thwâ ýasna
rathwya vaca sevishta
mithra ýazâi zaothrâbyô,
aoxtô-nâmana thwâ ýasna
rathwya vaca adhaoyamna
mithra ýazâi zaothrâbyô.

32.

surunuyå nô mithra ýasnahe
xshnuyå nô mithra ýasnahe
upa-nô ýasnem âhisha
paiti-nô zaothrå vîsanguha
hãm hîsh cimâne baranguha
nî-hîsh dasva garônmâne.

33.

dazdi ahmâkem tat âyaptem
ýase-thwâ ýâsâmahi sûra
urvaiti dâtanãm sravanghãm
îshtîm amem verethrakhnemca
havanghum ashavastemca
haosravanghem hurunîmca
mastîm spânô vaêidhîmca
verethrakhnemca ahuradhâtem
vanaiñtîmca uparatâtem
ýãm ashahe vahishtahe
paiti-parshtîmca mãthrahe speñtahe,

34.

ýatha vaêm humananghô
framananghasca urvâzemna haomananghimna
vanâma vîspê harethê,
ýatha vaêm humananghô
framananghasca urvâzemna haomananghimna
vanâma vîspê dushmainyush,
ýatha vaêm humananghô
framananghasca urvâzemna
haomananghimna vanâma
vîspå tbaêshå taurvayama
daêvanãm mashyânãmca
ýâthwãm pairikanãmca
sâthrãm kaoyãm karafnãmca.
ahe raya ... tåscâ ýazamaide!

35.

mithrem vouru-gaoyaoitîm ... jakhaurvånghem
arenat-caêshem viñdat-spâdhem
hazangra-ýaoxshtîm xshayañtem
xshayamnem vîspô-vîdhvånghem,

36.

ýô arezem frashâvayeiti
ýô areze paiti hishtaiti
ýô areze paiti hishtemnô
frâ rasmanô scañdayeiti,
ýaozeñti vîspe karanô
rasmanô arezô-shûtahe
frâ maidhyãnem xrånghayete
spâdhahe xrvîshyañtahe.

37.

avi dîsh aêm xshayamnô
âithîm barâiti thwyãmca,
para kameredhå spayeiti
mithrô-drujãm mashyânãm
para kameredhå vazaite
mithrô-drujãm mashyânãm.

38.

xrûmå shaitayô fraziñte
anashitå maêthanyå
ýâhva mithrô-drujô shyete
haithîm-ashava-janasca drvañtô,
xrûmîm gâush ýâ cangranghâxsh
varaithîm pañtãm azaite
ýâ darenâhu mithrô-drujãm mashyânãm
frazarshta aêshãm raithya
asrû azânô hishteñte
anu-zafanô takahe.

39.

ishavascit aêshãm erezifyô-parena
huthaxtat haca thanvanât
jya-jatånghô vazemna
ashemnô-vîdhô bavaiti
ýatha grañtô upa-tbishtô
apaiti-zañtô mithnâiti
mithrô ýô vouru-gaoyaoitish, arshtayascit aêshãm huxshnuta tikhra darekha-arshtaya
vazemna haca bâzubyô
ashemnô-vîdhô bavaiti
ýatha grañtô upa-tbishtô
apaiti-zañtô mithnâiti
mithrô ýô vouru-gaoyaoitish, zarshtvacit aêshãm fradaxshanya
vazemna haca bâzubyô
ashemnô-vîdhô bavaiti
ýatha grañtô upa-tbishtô
apaiti-zañtô mithnâiti
mithrô ýô vouru-gaoyaoitish.

40.

karetacit aêshãm
hufrâyuxta ýôi nikhrâire
sarahu mashyâkanãm
ashemnô-janô bavaiti
ýatha grañtô upa-tbishtô
apaiti-zañtô mithnâiti
mithrô ýô vouru-gaoyaoitish, vazracit aêshãm
hunivixta ýôi nikhrâire
sarahu mashyâkanãm
ashemnô-janô bavaiti
ýatha grañtô upa-tbishtô
apaiti-zañtô mithnâiti
mithrô ýô vouru-gaoyaoitish.

41.

mithrô avi-thrånghayete
rashnush paiti-thrånghayete
sraoshô ashyô vîspaêibyô
naêmaêibyô hãm-vâiti
paiti thrâtâra ýazata,
tê rasmanô raêcayeiñti
ýatha grañtô upa-tbishtô
apaiti-zañtô mithnâiti
mithrô ýô vouru-gaoyaoitish

42.

uityaojanå mithrâi vouru-gaoyaoitêe,
âi mithra vouru-gaoyaoite
ime nô aurvañtô aspa
para mithrâdha nayeñte
ime nô ukhra-bâzava
kareta mithra sciñdayeiñti.

43.

pascaêta dîsh fraspayeiti
mithrô ýô vouru-gaoyaoitish
pañcasakhnâi satakhnâishca
satakhnâi hazangrakhnâishca
hazangrakhnâi baêvarekhnâishca
baêvarekhnâi ahãxshtakhnâishca
ýatha grañtô upa-tbishtô
mithrô ýô vouru-gaoyaoitish.
ahe raya ... tåscâ ýazamaide!

44.

mithrem vouru-gaoyaoitîm ... jakhaurvånghem
ýenghe zem-frathô maêthanem
vîdhâtem astvañti anghvô
mazat anãzô bâmîm
perethu aipi vouru-ashtem,

45.

ýenghe ashta râtayô
vîspâhu paiti barezâhu
vîspâhu vaêdhayanâhu
spasô ånghâire mithrahe
mithrô-drujem hispôsemna
ave aipi daidhyañtô
ave aipi hishmareñtô
ýôi paurva mithrem druzhiñti
avaêshãmca pathô påñtô
ýim iseñti mithrô-drujô
haithîm-ashava-janasca drvañtô

46.

avå pavå pasca pavå
parô pavå spash vîdhaêta
adhaoyamnô frâ anghe vîsaiti
mithrô ýô vouru-gaoyaoitish
ýahmâi frashni avi manô
mithrô jasaiti avainghe
ýô baêvare-spasanô sûrô
vîspô-vîdhvå adhaoyamnô.
ahe raya ... tåscâ ýazamaide!

47.

mithrem vouru-gaoyaoitîm ... jakhaurvånghem,
ýim frasrûtem zaranimnem
perethu-safånghô vazeñti
avi haênayå xrvishyeitish
avi hãm-ýañta rasmaoyô
añtare dainghu pâperetâne.

48.

âat ýat mithrô fravazaite
avi haênayå xrvishyeitish
avi hãm-ýañta rasmaoyô
añtare dainghu pâperetâne
athra narãm mithrô-drujãm
apãsh gavô darezayeiti
para daêma vârayeiti
apa gaosha taoshayeiti
nôit pâdha vîdhârayeiti
nôit paiti-tavå bavaiti
tâ dainghâvô tê hamerethê
ýatha duzhbereñtô baraiti
mithrô ýô vouru-gaoyaoitish.
ahe raya ... tåscâ ýazamaide!

49.

mithrem vouru-gaoyaoitîm ... jakhaurvånghem,

50.

ýahmâi maêthanem frâthweresat
ýô dadhvå ahurô mazdå
upairi harãm berezaitîm
pouru-fraorvaêsyãm bâmyãm
ýathra nôit xshapa nôit temå
nôit aotô vâtô nôit garemô
nôit axtish pouru-mahrkô
nôit âhitish daêvô-dâta
naêdha dunmãn uzjasaiti
haraithyô paiti barezayå

51.

ýat kerenâun ameshå speñta vîspe hvare- hazaosha
fraoret fraxshni avi manô
zrazdâtôit anguhyat haca
ýô vîspem ahûm astvañtem âdidhâiti
haraithyât paiti barezanghat.

52.

âat ýat duzhdå fradvaraiti
ýô akhâvaresh thwâsha gâma
thwâshem ýujyeiti vâshem
mithrô ýô vouru-gaoyaoitish
sraoshasca ashyô sûrô
nairyô-sanghasca ýô mâyush, rasmô-jatem vâ-dim jaiñti amô-jatem vâ.
ahe raya ... tåscâ ýazamaide!

53.

mithrem vouru-gaoyaoitîm ... jakhaurvånghem
ýô bâdha ustânazastô
gerezaite ahurâi mazdâi uiti aojanô,

54.

azem vîspanãm dâmanãm
nipâta ahmi hvapô
azem vîspanãm dâmanãm
nishhareta ahmi hvapô, âat mâ nôit mashyâka aoxtô-nâmana ýasna ýazeñte ýatha anye ýazatånghô aoxtô-nâmana ýasna ýazeñti

55.

ýeidhi-zî-mâ mashyâka aoxtô-nâmana ýasna ýazayañta ýatha anye ýazatånghô aoxtô-nâmana ýasna ýazeñti
frâ nuruyô ashavaoyô
thwarshtahe zrû âyu shûshuyãm
hvahe gayehe hvanvatô ameshahe
upa thwarshtahe jakhmyãm.

56.

aoxtô-nâmana thwâ ýasna
rathwya vaca ýazaite
barô-zaothrô ashava,
aoxtô-nâmana thwâ ýasna
rathwya vaca sûra
mithra ýazâi zaothrâbyô,
aoxtô-nâmana ... ýazâi zaothrâbyô. (Repeat verse 31.)

57-59.

surunuyå nô mithra ýasnahe ... karafnãmca. (Repeat verses 32-34.)
ahe raya ... tåscâ ýazamaide!

60.

mithrem vouru-gaoyaoitîm ... jakhaurvånghem
ýenghe vohu haosravanghem
vanguhi kerefsh vanguhi frasasti, vasô-ýânem vasô-gaoyaoitîm ataurvayô idha fshuyañtem vâstrîm vasô-ýaonâi iñtãm hudhånghem ýô baêvare-spasânô sûrô vîspô-vîdhvå adhaoyamnô.
ahe raya ... tåscâ ýazamaide!

61.

mithrem vouru-gaoyaoitîm ... jakhaurvånghem
eredhwô-zeñgem zaênanghuñtem
spasem taxmem vyâxanem
frat-âpem zavanô-srûtem
tat-âpem uxshyat-urvarem
karshô-râzanghem vyâxanem
ýaoxshtivañtem adhaoyamnem
pouru-ýaoxshtîm dâmidhâtem,

62.

ýô nôit kahmâi mithrô-drujãm mashyânãm
aojô dadhâiti nôit zâvare,
ýô nôit kahmâi mithrô-drujãm mashyânãm
hvarenô dadhâiti nôit mizhdem.

63.

apa aêshãm bâzvå aojô tûm grañtô xshayamnô ... adhaoyamnô. (Repeat verses 23-24.)
ahe raya ... tåscâ ýazamaide!

64.

mithrem vouru-gaoyaoitîm ... jakhaurvånghem
ýahmi vyâne daênayâi
srîrayâi perethu-frâkayâi
maza amava nidhâtem ýahi paiti cithrem vîdhâtem vîspâish avi karshvãn ýâish hapta.

65.

ýô âsunãm âsush ýô aredranãm aredrô ýô taxmanãm taxmô ýô vyâxananãm vyâxanô ýô fraxshti-då ýô âzuiti-då ýô vãthwô- då ýô xshathrô-då ýô puthrô-då ýô gayô-då ýô havanghô-då ýô ashavastô-då.

66.

ýim hacaite ashish vanguhi
pâreñdica raoratha
ukhraca naire hãm-vareitish
ukhremca kavaêm hvarenô
ukhremca thwâshem hvadhâtem ukhremca dâmôish upamanô ukhråsca ashaonãm fravashayô
ýasca pourunãm hathrâkô
ashaonãm mazdayasnanãm.
ahe raya ... tåscâ ýazamaide!

67.

mithrem vouru-gaoyaoitîm ... jakhaurvånghem
ýô vâsha mainyu-hãm-tâshta
berezi-caxra fravazaite
haca karshvare ýat arezahi
upa karshvare ýat hvanirathem bâmîm
rathwya cithra hacimnô
hvarenanghaca mazdadhâta
verethrakhnaca ahuradhâta.

68.

ýenghe vâshem hangrewnâiti
ashish vanguhi ýâ berezaiti
ýenghe daêna mâzdayasnish
hvîte pathô râdhaiti,
ýim aurvañtô mainyavånghô
aurusha raoxshna frâderesra
speñta vîdhvånghô asaya
manivasanghô vazeñti
ýat dim dâmôish upamanô
hu-irixtem bâdha irinaxti,
ýahmat haca fratereseñti
vîspe mainyava daêva
ýaêca varenya drvañtô.

69.

môi-tû ithra ahurahe
grañtahe vaêkhâi jasaêma
ýenghe hazangrem vaêkhanãm
paiti hamerethâi jasaiti
ýô baêvare-spasânô sûrô
vîspô-vîdhvå adhaoyamnô.
ahe raya ... tåscâ ýazamaide!

70.

mithrem vouru-gaoyaoitîm ... jakhaurvånghem
ýenghe paurva-naêmât vazaite
verethrakhnô ahuradhâtô
hû kehrpa varâzahe
paiti-erenô tizhi-dãstrahe
arshnô tizhi-asûrahe
hakeret-janô varâzahe
anu-pôithwahe grañtahe
parshvanikahe taxmahe ayanghô-pâdhahe ayanghô-zastahe ayanghô-jyehe ayanghô-dumahe
ayanghô-paitishhvarenahe

71.

ýô frãshtacô hamerethâdha
upa-haxtô â-manangha
hathra nairya hãm-vareta
stija nijaiñti hamerethê
naêdha manyete jakhnvå
naêdha cim khenãm sadayeiti
ýavata aêm nijaiñti
merezuca stûnô gayehe
merezuca xå ushtânahe.

72.

hakat vîspå aipi-kereñtaiti ýô hakat astêsca varesêsca mastarekhnasca vohunishca zemâdha hãm-raêthwayeiti mithrô-drujãm mashyânãm.
ahe raya ... tåscâ ýazamaide!

73.

mithrem vouru-gaoyaoitîm ... jakhaurvånghem
ýô bâdha ustânazastô
urvâzemnô avarôit vâcim uityaojanô,
ahura mazda mainyô
spênishta dâtare gaêthanãm
astvaitinãm ashâum

74.

ýedhi-zî-mâ mashyâka aoxtô-nâmana ýasna ýazayañta ýatha anye ýazatånghô aoxtô-nâmana ýasna ýazeñti
frâ nuruyô ashavaoyô
thwarshtahe zrû âyû shûshuyãm
hvahe gayehe hvanvatô ameshahe
upa thwarshtahe jakhmyãm.

75.

buyama tê shôithrô-pânô
mâ buyama shôithrô-iricô mâ nmânô-iricô mâ vîsô-iricô mâ zañtu-iricô mâ dainghu-iricô
mâdha ýat nô ukhra-bâzâush
nivânât parô tbishyañbyô.

76.

tûm aêshãm tbishyatãm tûm aêshãm tbaêshanguhatãm tbaêshå sciñdayehi,
sciñdaya ashavajanô
hvaspô ahi hurâthyô
zavanô-sva ahi sûrô.

77.

âca-thwâ zbayâi avainghe,
âca-nô jamyât avainghe
ash-frâyashtica zaothranãm hufrâyashtica ash-frabereitica zaothranãm hufrabereitica ýatha thwâ aiwishayamna darekha aiwishayana
hushitem berekhmya-shaêtem.

78.

tûm tâ dainghâvô nipâhi
ýâ hubereitîm ýâtayeiti
mithrahe vouru-gaoyaoitish,
tûm tâ frasciñdayehi
ýâ rãxshyeitîsh dainghâvô,
âca-thwâ zbayâi avainghe,
âca-nô jamyât avah'yâi
ukhrô aiwithûrô ýesnyô vahmyô
mithrô raêvå dainghupaitish.
ahe raya ... tåscâ ýazamaide!

79.

mithrem vouru-gaoyaoitîm ... jakhaurvånghem
ýô rashnush daidhe maêthanem
ýahmâi rashnush darekhâi haxedhrâi
frabavara manavaiñtîm.

80.

tûm maêthanahe pâta
nipâta ahi adruzhãm,
tûm varezânahe paiti
nish-hareta ahi adruzhãm,
thwâ paiti zî haxedhrem daidhe vahishtem
verethrakhnemca ahuradhâtem
ýahmi sôire mithrô-drujô
aipi vîthishi jata
paurva mashyâkånghô.
ahe raya ... tåscâ ýazamaide!

81.

mithrem vouru-gaoyaoitîm ... jakhaurvånghem
ýô rashnush daidhe maêthanem
ýahmâi rashnush darekhâi haxedhrâi
bavara manavaiñtîm.

82.

ýenghe hazangrem ýaoxshtinãm
fradathat ahurô mazdå
baêvare dôithranãm vîdôithre, âat âbyô dôithrâbyô aiwyasca ýaoxshtibyô spasyeiti mithrô-zyãm mithrô-drujemca, âat âbyô dôithrâbyô aiwyasca ýaoxshtibyô adhaoyô asti mithrô ýô baêvare-spasanô sûrô vîspô- vîdhvå adhaoyamnô.
ahe raya ... tåscâ ýazamaide!

83.

mithrem vouru-gaoyaoitîm ... jakhaurvånghem ýim dainghêush dainghupaitish bâdha ustânazastô zbayeiti avainghe, ýim zañtêush zañtupaitish bâdha ustânazastô zbayeiti avainghe.

84.

ýim vîsô vîspaitish bâdha ustânazastô zbayeiti avainghe, ýim nmânahe nmânô-paitish bâdha ustânazastô zbayeiti avainghe, ýim dvâcina pithe hacimna bâdha ustânazastô zbayeiti avainghe,
ýim drikhushcit ashôtkaêshô
apayatô havâish dâtâish bâdha ustânazastô zbayeiti avainghe,

85.

ýenghe vâxsh gerezânahe
us ava raocå ashnaoiti
ava pairi imãm zãm jasaiti
vî hapta karshvãn jasaiti ýatcit nemangha vâcim baraiti ýat gaoshcit.

86.

ýâ vareta azimna
badhâ ustânazastô zbayeiti avainghe
gavaithîm paitishmaremna,
kadha-nô arsha gavaithîm
apayât paskât vazemnô
mithrô ýô vouru-gaoyaoitish
kadha-nô fraourvaêsayâiti
ashahe paiti pañtãm
drujô vaêsmenda azemnãm.

87.

âat ýahmâi xshnûtô bavaiti
mithrô ýô vouru-gaoyaoitish
ahmâi jasaiti avainghe,
âat ýahmâi tbishtô bavaiti
mithrô ýô vouru-gaoyaoitish ahmâi frasciñdayeiti nmânemca vîsemca zañtûmca dah'yûmca dainghusastîmca.
ahe raya ... tåscâ ýazamaide!

88.

mithrem vouru-gaoyaoitîm ... jakhaurvånghem ýim ýazata
haomô frâshmish baêshazyô
srîrô xshathryô zairidôithrô
barezishte paiti barezahi
haraithyô paiti barezayå
ýat vaocê hûkairîm nãma
anâhitem anâhitô
anâhitât parô baresmen anâhitayât parô zaothrayât anâhitaêibyô parô vakhzhibyô.

89.

ýim zaotârem stayata
ahurô mazdå ashava
âsu-ýasnem berezi-gâthrem, ýazata zaota âsu-ýasnô berezi-gâthrô berezata vaca zaota ahurâi mazdâi zaota ameshanãm speñtanãm, hô vâxsh us ava raocå ashnaot ava pairi imãm zãm jasat vîjasât vîspâish avi karshvãn ýâish hapta.

90.

ýô paoiryô hâvana haomã uzdasta
stehrpaêsangha mainyutâshta
haraithyô paiti barezayå,
berejayat ahurô mazdå
berejayen ameshå speñta
ýenghå kehrpô huraodhayå
ýahmâi hvare aurvat-aspem
dûrât nemô baodhayeiti,

91.

nemô mithrâi vouru-gaoyaoitêe hazangrô- gaoshâi baêvare-cashmaine,
ýesnyô ahi vahmyô
ýesnyô buyå vahmyô
nmânâhu mashyâkanãm,
ushta buyât ahmâi naire
ýase-thwâ bâdha frâyazâite
aêsmô-zastô baresmô-zastô
gaozastô hâvanô-zastô frasnâtaêibya zastaêibya frasnâtaêibya hâvanaêibya frasteretât paiti baresmen uzdâtât paiti haomât srâvayamnât paiti ahunât vairyât.

92.

aya daênaya fraoreñta
ahurô mazdå ashava frâ vohu manô frâ ashem vahishtem frâ xshathrem vairîm frâ speñta ârmaiti frâ haurvata ameretâta,
frâ-hê ameshå speñta
bereja vereñta daênayâi,
frâ-hê mazdå hvâpå
ratuthwem barât gaêthanãm
ýôi-thwâ vaênen dâmôhu
ahûm ratûmca gaêthanãm
ýaozhdâtârem ånghãm dâmanãm vahishtãm.

93.

adha vaêibya ahubya
vaêibya nô ahubya nipayå
âi mithra vouru-gaoyaoite
aheca anghêush ýô astvatô
ýasca asti manahyô pairi drvatat mahrkât pairi drvatat aêshmât
pairi drvataêibyô haênêbyô
ýå us xrûrem drafshem gerewnãn
aêshmahe parô draomêbyô
ýå aêshmô duzhdå drâvayât
mat vîdhâtaot daêvô-dâtât.

94.

adha-nô-tûm mithra vouru-gaoyaoite
zâvare dayå hitaêibyô
drvatâtem tanubyô
pouru-spaxshtîm tbishyañtãm
paiti-jaitîm dushmainyunãm
hathrânivâitîm hamerethanãm
aurvathanãm tbishyañtãm.
ahe raya ... tåscâ ýazamaide!

95.

mithrem vouru-gaoyaoitîm ... jakhaurvånghem
ýô zem-frathå aiwyâiti
pasca hû frâshmô-dâitîm
marezaiti va karana
ainghå zemô ýat pathanayå
skarenayå dûraêpârayå,
vîspem imat âdidhâiti
ýat añtare zãm asmanemca,

96.

vazrem zastaya drazhemnô
satafshtânem satô-dârem
fravaêkhem vîrô-nyåñcim
zarôish ayanghô frahixtem
amavatô zaranyehe
amavastemem zaênãm
verethravastemem zaênãm.

97.

ýahmat haca frateresaiti
angrô mainyush pouru-mahrkô
ýahmat haca frateresaiti
aêshmô duzhdå peshô-tanush
ýahmat haca frateresaiti
bûshyãsta darekhô-gava
ýahmat haca fratereseñti
vîspe mainyava daêva
ýaêca varenya drvañtô.

98.

mâ mithrahe vouru-gaoyaoitôish
grañtahe vaêkhâi jasaêma,
mâ-nô grañtô aipi-janyå
mithra ýô vouru-gaoyaoitish
ýô aojishtô ýazatanãm
ýô tañcishtô ýazatanãm
ýô thwaxshishtô ýazatanãm
ýô âsishtô ýazatanãm
ýô as verethrajãstemô ýazatanãm
fraxshtaite paiti âya zemâ
mithrô ýô vouru-gaoyaoitish.
ahe raya ... tåscâ ýazamaide!

99.

mithrem vouru-gaoyaoitîm ... jakhaurvånghem,
ýahmat haca fratereseñta
vîspe mainyava daêva
ýaêca varenya drvañtô,
fravazaite dainghupaitish
mithrô ýô vouru-gaoyaoitish
dashinem upa karanem
ainghå zemô ýat pathanayå
skarenayå dûraêpârayå.

100.

dashinem hê upa aredhem vazaite ýô vanghush sraoshô ashyô, vairya-stârem hê upa aredhem vazaite rashnush berezô ýô amavå, vîspê hê upa aredhem vazeñti ýå âpô ýåsca urvarå ýåsca ashaonãm fravashayô.

101.

avi-dîsh aêm xshayamnô hamatha baraiti ishavô erezifyô-parena, âat ýat athra para-jasaiti vazemnô ýathra dainghâvô avi-mithranyå
hô paoiryô gadhãm nijaiñti
aspaêca paiti vîraêca,
hathra tarshta thrånghayete
vaya aspa-vîraja.
ahe raya ... tåscâ ýazamaide!

102.

mithrem vouru-gaoyaoitîm ... jakhaurvånghem aurushâspem tizhi-arshtîm darekha-areshtaêm
xshviwi-ishûm parô-kevîdhem
hunairyåñcim rathaêshtãm.

103.

ýim haretâremca aiwyâxshtâremca
fradathat ahurô mazdå
vîspayå fravôish gaêthayå,
ýô haretaca aiwyâxshtaca
vîspayå fravôish gaêthayå,
ýô anavanguhabdemnô zaênangha
nipâiti mazdå dâmãn
ýô anavanguhabdemnô zaênangha
nishhaurvaiti mazdå dâmãn.
ahe raya ... tåscâ ýazamaide!

104.

mithrem vouru-gaoyaoitîm ... jakhaurvånghem
ýenghe darekhâcit bâzava
fragreweñti mithrô-aojanghô
ýatcit ushastaire hiñdvô âgeurvayeite
ýatcit daoshataire nikhne
ýatcit sanake ranghayå
ýatcit vîmaidhîm ainghå zemô.

105.

temcit mithrô hañgrefshemnô
pairi apaya bâzuwe,
dushhvarenå nashtô razishta
ashâtô asti anguhaya,
itha mainyete dushhvarenå,
nôit imat vîspem duzhvarshtem
nôit vîspem aiwi-druxtêe
mithrô vaênaiti apishma.

106.

âat azem manya mananghô,
nôit mashyô gaêthyô stê
aojô manyete dushmatem
ýatha mithrascit mainyavô
aojô manyete humatem,
nôit mashyô gaêthyô stê
aojô mraoiti duzhuxtem
ýatha mithrascit mainyavô
aojô mraoiti hûxtem,
nôit mashyô gaêthyô stê
aojô verezyeiti duzhvarshtem
ýatha mithrascit mainyavô
aojô verezyeiti hvarshtem.

107.

nôit mashîm gaêthîm stê
masyå hacaite âsnô xratush
ýatha mithremcit mainyaom
hacaite âsnascit xratush,
nôit mashyô gaêthyô stê
aojô surunaoiti gaoshaiwe
ýatha mithrascit mainyavô
srut-gaoshô hazangra-ýaoxshtish
vîspem vaênaiti druzhiñtem,
amava mithrô fraxshtâite
ukhra vazaite xshathrahe
srîra dadhâiti daêmâna
dûrât-sûka dôithrâbya,

108.

kô mãm ýazâite kô druzhât
kô huyeshti kô duzhyeshti
mãm zî mainyete ýazatem,
kahmâi raêshca hvarenasca
kahmâi tanvô drvatâtem
azem baxshâni xshayamnô,
kahmâi îshtîm pourush-hvâthrãm
azem baxshâni xshayamnô
kahmâi âsnãmcit frazaiñtîm
us apara barezayeni,

109.

kahmâi azem ukhrem xshathrem
hvainisaxtem pouru-spâdhem
amainimnahe mananghô
paiti-dathâni vahishtem
sâthrascit hamô-xshathrahe
kameredhô-janô aurvahe
vanatô avanemnahe
ýô nishtayeiti keretêe sraoshyãm, ishare hâ nishtâta kiryeiti
ýezi grañtô nishtayeiti
tbishtahecit axshnushtahe
mithra manô râmayeiti
huxshnûitîm paiti mithrahe.

110.

kahmâi ýaskemca mahrkemca
kahmâi ainishtîm ducithrem
azem baxshâni xshayamnô,
kahmâi âsnãmcit frazaiñtîm
hathra-jata nijanâni,

111.

kahmâi azem ukhrem xshathrem
hvainisaxtem pouru-spâdhem
amainimnahe mananghô
apabarâni vahishtem
sâthrascit hamô-xshathrahe
kameredhô-janô aurvahe
vanatô avanemnahe
ýô nishtayeiti keretêe sraoshyãm, ishare hâ nishtâta kiryeti
ýezi grañtô nishtayeiti
xshnûtahecit atbishtahe
mithra manô ýaozayeiti
axshnûitîm paiti mithrahe.
ahe raya ... tåscâ ýazamaide!

112.

mithrem vouru-gaoyaoitîm ... jakhaurvånghem, erezatô-frashnem zaranyô-vârethmanem
ashtranghâdhem amavañtem
taxmem vîspaitîm rathaêshtãm,
cithrå mithrahe frayanå
ýase-tãm dah'yûm âcaraiti
ýatha huberetô baraiti
pathanå jafrå gaoyaotêe âat hva pasu vîra vasô-xshathrô fracaraite.

113.

tadha nô jamyât avainghe
mithra ahura berezañta
ýat berezem barât ashtra vâcim
aspanãmca srifa xshufsãn
ashtrå kahvãn jyå navithyãn
tikhrånghô ashtayô tadha
hunavô gouru-zaothranãm
jata paithyåñte frâ-veresa.

114.

adha-nô-tûm mithra vouru-gaoyaoite
zâvare dayå hitaêibyô
drvatâtem tanubyô
pouru-spaxshtîm tbishyañtãm
paiti-jaitîm dushmainyunãm
hathrânivâitîm hamerethanãm
aurvathanãm tbishyañtãm.
ahe raya ... tåscâ ýazamaide!

115.

mithrem vouru-gaoyaoitîm ... jakhaurvånghem, âi mithra vouru-gaoyaoite nmânya ratvô vîsya zañtuma dah'yuma zarathushtrôtema.

116.

vîsaitivå asti mithrô añtare hasha suptidhareñga thrisathwå añtare varezâna cathwaresathwå añtare hadhô-gaêtha pañca-sathwå añtare huyâkhna xshvashtivå añtare hâvishta haptaithivå añtare aêthrya aêthra-paiti ashtaithivå añtare zâmâtara hvasura navaitivå añtare brâthra,

117.

satâyush añtare pitare puthremca hazangrâish añtare dah'yu
baêvarôish asti mithrô
ýô daênayå mâzdayasnôish ava hacaite amahe ayãn atha anghâiti verethrakhnahe.

118.

nemangha adhara dâta âjasâni upara dâta, ýatha avat hvarexshaêtem tarasca harãm berezaitîm fraca âiti aiwica vazaite avatha azemcit spitama nemangha adhara dâta âjasâni upara dâta tarasca angrahe mainyêush drvatô zaoshã.
ahe raya ... tåscâ ýazamaide!

119.

mithrem vouru-gaoyaoitîm ... jakhaurvånghem,
mithrem ýazaêsha spitama
framrvisha aêthryanãm,
ýazayañta thwãm mazdayasna
pasubya staoraêibya
vayaêibya pataretaêibya ýô parenînô fravazåñte.

120.

mithrô vîspê mazdayasnanãm ýãm ashaonãm eredhwâca kerethwâca haomô âvistô aiwi-vistô ýå zaota aiwica vaêdhayåñte fraca ýazåñte nâ ashava ýaozhdâtãm zaothrãm franguharât ýô kerenavât ýim ýazaite
mithrem ýim vouru-gaoyaoitîm xshnûtô atbishtô hyât.

121.

paiti-dim peresat zarathushtrô, kutha ahura mazda nâ ashava ýaozhdâtãm zaothrãm franguharât ýô kerenavât ýim ýazaite mithrem ýim vouru-gaoyaoitîm xshnûtô atbishtô hyât.

122.

âat mraot ahurô mazdå, thri-ayarem thri-xshaparem tanûm frasnayayañta thrisatem upâzananãm pairi-âkayayañta mithrahe vouru-gaoyaoitôish ýasnâica vahmâica, bi-ayarem bi-xshaparem tanûm frasnayayañta vîsaiti upâzananãm pairi-âkayayañta mithrahe vouru-gaoyaoitôish ýasnâica vahmâica, mâ-cish mê ånghãm zaothranãm franguharât ýâ nôit staotanãm ýesnyanãm âmâtô vîspe ratavô.
ahe raya ... tåscâ ýazamaide!

123.

mithrem vouru-gaoyaoitîm ... jakhaurvånghem,
ýim ýazata ahurô mazdå
raoxshnât paiti garô-nmânât.

124.

uzbâzâush paiti amerextîm
fravazaite mithrô ýô vouru-gaoyaoitish
haca raoxshnât garô-nmânât
vâshem srîrem vavazânem hâmô-taxmem
vîspô-paêsem zaranaênem.

125.

ahmya vâshe vazåñte
cathwârô aurvañtô
spaêtita hama-gaonånghô
mainyush-hvaretha anaoshånghô, tê para-safånghô zaranaêna paiti-shmuxta âat hê apara erezataêna, âat tê vîspa frâ-ýuxta hãm ivãmca simãmca simôithrãmca dereta hukereta upairispâtâ aka bastãm xshathrem vairîm.

126.

dashinem hê aredhe vazaite rashnvô razishtô spênishtô upa-raodhishtô, âat hê hâvôya aredhe vazaite razishtãm cistãm barat-zaothrãm ashaonîm spaêta vastrå vanghaiti spaêta daênayå mâzdayasnôish upamanem.

127.

upavazata taxmô dâmôish upamanô
hû kehrpa varâzahe
paiti-erenô tizhi-dãstrahe
arshnô tizhi-asûrahe
hakeret-janô varâzahe
anu-pôithwahe grañtahe
parshvanikahe taxmahe
ýûxdhahe pâirivâzahe, nixshata ahmât vazata âtarsh ýô upa-suxtô ukhrem ýô kavaêm hvarenô.

128.

hishtaite aom vâshahe
mithrahe vouru-gaoyaoitôish hazangrem thanvareitinãm [asti ýô gavasnahe snâuya jya] hukeretanãm,
mainyavaså vazeñti
mainyavaså pateñti
kameredhe paiti daêvanãm.

129.

hishtaite aom vâshahe
mithrahe vouru-gaoyaoitôish hazangrem ishunãm kahrkâsô-parnanãm zaranyô- zafrãm srvî-stayãm [asti ýâ anghaêna sparekha] hukeretanãm,
mainyavaså vazeñti
mainyavaså pateñti
kameredhe paiti daêvanãm.

130.

hishtaite aom vâshahe
mithrahe vouru-gaoyaoitôish hazangrem arshtinãm brôithrô-taêzhanãm hukeretanãm,
mainyavaså vazeñti
mainyavaså pateñti
kameredhe paiti daêvanãm,
hishtaite aom vâshahe
mithrahe vouru-gaoyaoitôish hazangrem cakushanãm haosafnaênãm bitaêkhanãm hukeretanãm,
mainyavaså vazeñti
mainyavaså pateñti
kameredhe paiti daêvanãm.

131.

hishtaite aom vâshahe
mithrahe vouru-gaoyaoitôish hazangrem karetanãm vayô-dâranãm hukeretanãm,
mainyavaså vazeñti
mainyavaså pateñti
kameredhe paiti daêvanãm,
hishtaite aom vâshahe
mithrahe vouru-gaoyaoitôish hazangrem gadhanãm ayanghaênanãm hukeretanãm,
mainyavaså vazeñti
mainyavaså pateñti
kameredhe paiti daêvanãm.

132.

hishtaite aom vâshahe
mithrahe vouru-gaoyaoitôish
vazrem srîrem hunivixtem
satafshtânem satôdârem
fravaêkhem vîrô-nyåñcim
zarôish ayanghô frahixtem
amavatô zaranyehe
amavastemem zayanãm
verethravastemem zayanãm,
mainyavaså vazeñti
mainyavaså pateñti
kameredhe paiti daêvanãm.

133.

pasca jaiñti daêvanãm
pasca nikhniñti mithrô-drujãm
mashyânãm fravazaite
mithrô ýô vouru-gaoyaoitish
tarô arezahi savahi tarô fradadhafshu vîdadhafshu tarô vouru-bareshti vouru- jareshti tarô imat karshvare ýat hvanirathem bâmîm.

134.

avi bâdha frateresaiti
angrô mainyush pouru-mahrkô,
avi bâdha frateresaiti
aêshmô duzhdå peshô-tanush,
avi bâdha frateresaiti
bûshyãsta darekhô-gava,
avi bâdha frateresaiti
vîspe mainyava daêva
ýaêca varenya drvañtô.

135.

mâ mithrahe vouru-gaoyaoitôish
grañtahe vaêkhâi jasaêma,
mâ-nô grañtô aipi-janyå
mithrô ýô vouru-gaoyaoitish
ýô aojishtô ýazatanãm
ýô tañcishtô ýazatanãm
ýô thwaxshishtô ýazatanãm
ýô âsishtô ýazatanãm
ýô as verethrajãstemô ýazatanãm
fraxshtaite paiti âya zemâ
mithrô ýô vouru-gaoyaoitish.
ahe raya ... tåscâ ýazamaide!

136.

mithrem vouru-gaoyaoitîm ... jakhaurvånghem
ýahmâi aurusha aurvañta
ýûxta vâsha thañjasåñte
aêva caxra zaranaêna
asânasca vîspô-bâma
ýezi-shê zaothrå baraiti avi-shê maêthanem.

137.

ushta ahmâi naire mainyâi
uiti mraot ahurô mazdå
âi ashâum zarathushtra
ýahmâi zaota ashava
anghêush dahmô tanu-mãthrô
frasteretât paiti baresmen
mithrahe vaca ýazâite
râshtem ahmâi naire mainyâi
mithrô maêthanem âcaraiti. ýezi-shê ýânâdha bavaiti sanghemcit anu sastrâi sanghemcit anu mainyâi,

138.

sâdrem ahmâi naire mainyâi
uiti mraot ahurô mazdå
âi ashâum zarathushtra
ýahmâi zaota anashava
adahmô atanu-mãthrô
pasca baresma frahishta
perenemca baresma starânô
darekhemca ýasnem ýazânô.

139.

nôit xshnâvayeiti ahurem mazdãm nôit anye ameshå speñta nôit mithrem ýim vouru-gaoyaoitîm ýô mazdãm tarô manyete tarô anye ameshå speñta tarô mithrem ýim vouru-gaoyaoitîm tarô dâtemca rashnûmca arshtâtemca frâdat-gaêthãm varedat-gaêthãm.
ahe raya ... tåscâ ýazamaide!

140.

mithrem vouru-gaoyaoitîm ... jakhaurvånghem,
ýazâi mithrem spitama
vanghush taxmem mainyaom
akhrîm hvâmarzhdikem
amithwem uparô-nmânem
aojanghem taxmem rathaêshtãm.

141.

verethravå zaêna hacimnô hutâshta temanghâdha jikhâurum adhaoyamnem, aojishtanãm asti aojishtem tañcishtanãm asti tañcishtem bakhanãm asti ash-xrathwastemô verethravå hvarena hacimnô hazangrâ- gaoshô baêvare-cashmanô
ýô baêvare-spasânô sûrô
vîspô-vîdhvå adhaoyamnô.
ahe raya ... tåscâ ýazamaide!

142.

mithrem vouru-gaoyaoitîm ... jakhaurvånghem ýô paoirish vaêidhish sûrem frâdhâiti speñtahe mainyêush dâmãn hudhâtô mazishtô ýazatô
ýatha tanûm raocayeiti
ýatha månghô hvâraoxshnô,

143.

ýenghå ainikô brâzaiti
ýatha tishtryô-stârahe
ýenghe vâshem hañgrewnâiti
adhavish paoirîsh spitama ýatha dâmãn sraêshtâish hû-bâmya xshaêtâi ýazâi hãm-tashtem ýô dadhvå speñtô mainyush
stehrpaêsanghem mainyu-tâshtem
ýô baêvare-spasânô sûrô
vîspô-vîdhvå adhaoyamnô.
ahe raya ... tåscâ ýazamaide!

144.

mithrem vouru-gaoyaoitîm ... jakhaurvånghem, mithrem aiwi-dah'yûm ýazamaide, mithrem añtare-dah'yûm ýazamaide, mithrem â-dah'yûm ýazamaide, mithrem upairi-dah'yûm ýazamaide, mithrem adhairi-dah'yûm ýazamaide, mithrem pairi-dah'yûm ýazamaide, mithrem aipi-dah'yûm ýazamaide.

145.

mithra ahura berezañta
aithyejangha ashavana ýazamaide,
strêushca månghemca hvareca
urvarå paiti baresmanyå
mithrem vîspanãm dah'yunãm
dainghupaitîm ýazamaide.
ahe raya ... tåscâ ýazamaide!

(Recite silently:)

146.

(hôrmezd i hvadâe i awazûnî mardum mardum sardagã hamâ sardagã ham bâ ýasht i vahã vaem vahe dîn i mâzdayasnã âgâhî âstvãnî nêkî rasãnât êduñ bât,)

(Recite aloud:)

ýathâ ahû vairyô...(2).
ýasnemca vahmemca aojasca zavareca âfrînâmi
mithrahe vouru-gaoyaoitôish râmanô hvâstrahe.
ashem vohû....
ahmâi raêshca ... hazangrem ... jasa-mê ... (kerba mazhd) ... ashem vohû...!!