8. Tishtar Yasht

Based on edition of Karl F. Geldner, Avesta, the Sacred Books of the Parsis, Stuttgart, 1896.

0.

(pa nãm i ýazdã, hôrmezd i hvadâe i awazûnî gurz hvarahe awazâyât,
tishtar i rayômañd i hvarahemañd bê rasât,
ezh hamâ gunâh ... pa patit hôm!)
xshnaothra ahurahe mazdå tarôidîti angrahe mainyêush, haithyâvarshtãm hyat vasnâ ferashôtemem.

staomi ashem,
ashem vohû...(3).
fravarâne mazdayasnô zarathushtrish vîdaêvô ahura-tkaêshô


(Here recite the appropriate Gah dedication.)

tishtryehe stârô raêvatô hvarenanguhatô satavaêsahe frâpahe sûrahe mazdadhâtahe
xshnaothra ýasnâica vahmâica xshnaothrâica frasastayaêca,
ýathâ ahû vairyô zaotâ frâ-mê mrûtê,
athâ ratush ashâtcît haca frâ ashava vîdhvå mraotû.

[1]

1.

mraot ahurô mazdå spitamâi zarathushtrâi, pånghahe anghuthwemca ratuthwemca,
månghemca maêthanemca
myazdemca frâ-ýazamaide,
ýat mê stârô hvarenanguhañtô
hacåñte paraca må
nerebyô hvarenô baxsheñti,
ýazâi shôithrahe baxtârem
tishtrîm stârem zaothrâbyô,

2.

tishtrîm stârem raêvañtem
hvarenanguhañtem ýazamaide
râma-shayanem hushayanem
aurushem raoxshnem frâderesrem
vyâvañtem baêshazîm
ravô-fraothmanem berezañtem
dûrât vyâvañtem bânubyô
raoxshnibyô anâhitaêibyô,
apemca perethu-zrayanghem
vanguhîmca dûrât frasrutãm
gêushca nãma mazdadhâtem
ukhremca kavaêm hvarenô
fravashîmca spitamahe
ashaonô zarathushtrahe.

3.

ahe raya hvarenanghaca
tem ýazâi surunvata ýasna
tishtrîm stârem zaothrâbyô,
tishtrîm stârem raêvañtem
hvarenanguhañtem ýazamaide
haomayô gava baresmana
hizvô danghangha mãthraca
vacaca shyaothnaca zaothrâbyasca
arshuxdhaêibyasca vâkhzhibyô.

ýenghê hâtãm âat ýesnê paitî vanghô mazdå ahurô vaêthâ ashât hacâ ýånghãmcâ tãscâ tåscâ ýazamaide.

[2]

4.

tishtrîm stârem raêvañtem
hvarenanguhañtem ýazamaide
afshcithrem sûrem berezañtem
amavañtem dûraêsûkem
berezañtem uparô-kairîm
ýahmât haca berezât haosravanghem
apãm nafedhrat haca cithrem.
ahe raya ... tåscâ ýazamaide (See verse 3).

[3]

5.

tishtrîm stârem raêvañtem
hvarenanguhañtem ýazamaide
ýim paitishmareñte pasvasca staorâca
mashyâca parô dareshvãnô
kaêtaca parô druzhiñtô,
kadha-nô aoi uzyarât
tishtryô raêvå hvarenanguhå
kadha xå aspô-staoyehîsh
apãm tacåñti nava,
ahe raya ... tåscâ ýazamaide (See verse 3).

[4]

6.

tishtrîm stârem raêvañtem
hvarenanguhañtem ýazamaide
ýô avavat xshvaêwô vazâite
avi zrayô vourukashem
ýatha tikhrish mainyavaså
ýim anghat erexshô xshviwi-ishush
xshviwi-ishvatemô airyanãm
airyô-xshuthat haca garôit
hvanvañtem avi gairîm.

7.

tadha dim ahurô mazdå avãn dâta tat âpô urvaråsca
pairi-shê vouru-gaoyaoitish
mithrô frâdhayat pañtãm.
ahe raya ... tåscâ ýazamaide (See verse 3)!

[5]

8.

tishtrîm stârem raêvañtem
hvarenanguhañtem ýazamaide
ýô pairikå taurvayeiti
ýô pairikå titârayeiti
ýå stârô keremå patañti
añtare zãm asmanemca
zraya vourukashaya
amavatô huraodhahe
jafrahe uruyâpahe,
bâdha vairîm âcaraiti
aspô-kehrpãm ashaonîm upâca tå âpô ýaozayeiti aiwica vâta våñti ýaoxtivañtô.

9.

âat tå âpô frashavayeiti satavaêsô avi haptô-kareshvairîsh,
vyâhva ýat jasaiti
srîrô hishtaiti râmanivå
huyâiryå avi dainghush,
kadha airyå dainghâvô
huyâiryå bavåñti.
ahe raya ... tåscâ ýazamaide (See verse 3)!

[6]

10.

tishtrîm stârem raêvañtem hvarenanguhañtem ýazamaide,
ýô aoxta ahurâi mazdâi uityaojanô,
ahura mazda mainyô
spênishta dâtare gaêthanãm
astvaitinãm ashâum

11.

ýedhi-zî-mâ mashyâka aoxtô-nâmana ýasna ýazayañta ýatha anye ýazatånghô aoxtô-nâmana ýasna ýaziñti
frâ neruyô ashavaoyô
thwarshtahe zrû âyu shushuyãm
hvahe gayehe hvanvatô ameshahe
upa thwarshtahe jakhmyãm
aêvãm vâ avi xshapanem
duyê vâ pañcâsatem vâ.

12.

tishtrîmca ýazamaide, tishtryaêinyasca ýazamaide upa-paoirîmca ýazamaide paoiryaêinyasca ýazamaide ave strêush ýã haptôiriñga paitishtâtêe ýâthwãm pairikanãmca, vanañtem stârem mazdadhâtem ýazamaide amaheca paiti hutâshtahe verethrakhnaheca paiti ahuradhâtahe vanaiñtyåsca paiti uparatâtô vîtare-ãzahyehe paiti vîtare- tbaêshahyeheca, tishtrîm drvô-cashmanem ýazamaide.

13.

paoiryå dasa xshapanô spitama zarathushtra tishtryô raêvå hvarenanguhå kehrpem raêthwayeiti raoxshnushva vazemnô
narsh kehrpa pañca-dasanghô
xshaêtahe spiti-dôithrahe
berezatô avi-amahe
amavatô hunairyåñcô

14.

tadha ayaosh ýatha paoirîm
vîrem avi ýå bavaiti
tadha ayaosh ýatha paoirîm
vîrem avi amô aêiti
tadha ayaosh ýatha paoirîm
vîrem erezushãm adaste.

15.

hô ithra vyâxmanyeiti
hô ithra paresanyeiti,
kô mãm nûrãm frâyazâite gaomavaitibyô haomavaitibyô zaothrâbyô, kahmâi azem dadhãm vîrayãm îshtîm vîrayãm vãthwãm havaheca urunô ýaozhdâthrem,
nûrãm ahmi ýesnyasca
vahmyasca anguhe astvaite
ashât haca ýat vahishtât.

16.

bityå dasa xshapanô spitama zarathushtra tishtryô raêvå hvarenanguhå kehrpem raêthwayeiti raoxshnushva vazemnô
gêush kehrpa zaranyô-srvahe.

17.

hô ithra vyâxmanyeiti
hô ithra paresanyeiti,
kô mãm nûrãm frâyazâite gaomavaitibyô haomavaitibyô zaothrâbyô kahmâi azem dadhãm gaoyãm îshtîm gaoyãm vãthwãm havaheca urunô ýaozhdâthrem,
nûrãm ahmi ýesnyasca
vahmyasca anguhe astvaite
ashât haca ýat vahishtât.

18.

thrityå dasa xshapanô spitama zarathushtra tishtryô raêvå hvarenanguhå kehrpem raêthwayeiti raoxshnushva vazemnô
aspahe kehrpa aurushahe
srîrahe zairi-gaoshahe
zaranyô-aiwidhânahe.

19.

hô ithra vyâxmanyeiti
hô ithra paresanyeiti,
kô mãm nûrãm frâyazâite gaomavaitibyô haomavaitibyô zaothrâbyô kahmâi azem dadhãm aspayãm îshtîm aspayãm vãthwãm havaheca urunô ýaozhdâthrem,
nûrãm ahmi ýesnyasca
vahmyasca anguhe astvaite
ashât haca ýat vahishtât.

20.

âat paiti avâiti spitama zarathushtra
tishtryô raêvå hvarenanguhå
avi zrayô vourukashem
aspahe kehrpa aurushahe
srîrahe zairi-gaoshahe
zaranyô-aiwidhânahe.

21.

â-dim paiti-ýãsh nizhdvaraiti
daêvô ýô apaoshô
aspahe kehrpa sâmahe
kaurvahe kaurvô-gaoshahe
kaurvahe kaurvô-bareshahe
kaurvahe kaurvô-dûmahe
dakhahe aiwidhâtô-tarshtôish.

22.

hãm tâcit bâzush baratô spitama zarathushtra tishtryasca raêvå hvarenanguhå daêvasca ýô apaoshô
tå ýûidhyathô spitama zarathushtra
thri-ayarem thri-xshaparem, â-dim bavaiti aiwi-aojå â-dim bavaiti aiwi-vanyå daêvô ýô apaoshô tishtrîm raêvañtem hvarenanguhañtem.

23.

apa-dim adhât vyeiti
zrayanghat haca vourukashât
hâthrô-masanghem adhwanem,
sâdrem urvishtremca nimrûite
tishtryô raêvå hvarenanguhå
sâdrem mê ahura mazda
urvishtrem âpô urvaråsca
baxtem daêne mâzdayesne, nôit mãm nûrãm mashyâka aoxtô- nâmana ýasna ýazeñte ýatha anye ýazatånghô aoxtô- nâmana ýasna ýazeñti.

24.

ýeidhi-zî-mâ mashyâka aoxtô-nâmana ýasna ýazayañta ýatha anye ýazatånghô aoxtô-nâmana ýasna ýazeñti
avi mãm avi-bawryãm
dasanãm aspanãm aojô
dasanãm ushtranãm aojô
dasanãm gavãm aojô
dasanãm gairinãm aojô
dasanãm apãm nâvayanãm aojô.

25.

azem ýô ahurô mazdå tishtrîm raêvañtem hvarenanguhañtem aoxtô-nâmana ýasna ýaze,
avi dim avi-barâmi
dasanãm aspanãm aojô
dasanãm ushtranãm aojô
dasanãm gavãm aojô
dasanãm gairinãm aojô
dasanãm apãm nâvayanãm aojô.

26-28.

âat paiti avâiti spitama zarathushtra tishtryô raêvå hvarenanguhå avi zrayô vourukashem ... (See verse 20)
tå ýûidhyathô zarathushtra
â-rapithwinem zrvânem, â-dim bavaiti aiwi-aojå â-dim bavaiti aiwi-vanyå tishtryô raêvå hvarenanguhå daêûm ýim apaoshem.

29.

apa-dim adhât vyeiti
zrayanghat haca vourukashât
hâthrô-masanghem adhwanem,
ushtatâtem nimravaite
tishtryô raêvå hvarenanguhå
ushta-mê ahura mazda
ushta âpô urvaråsca
ushta daêne mâzdayesne
ushta â-bavât dainghavô
us vô apãm adhavô
apaiti-eretå jasåñti
ash-dânunãmca ýavanãm
kasu-dânunãmca vâstranãm
gaêthanãmca astvaitinãm.

30.

âat paiti avâiti spitama zarathushtra tishtryô raêvå hvarenanguhå
avi zrayô vourukashem
aspahe kehrpa aurushahe
srîrahe zairi-gaoshahe
zaranyô-aiwidhânahe.

31.

hô zrayô âyaozayeiti
hô zrayô vîvaozayeiti
hô zrayô âkhzrâdhayeiti
hô zrayô vîkhzrâdhayeiti
hô zrayô âkhzhârayeiti
hô zrayô vîkhzhârayeiti
ýaozeñti vîspe karanô
zrayâi vourukashaya
â vîspô maidhyô ýaozaiti.

32.

us paiti adhât hishtaiti spitama zarathushtra tishtryô raêvå hvarenanguhå zrayanghat haca vourukashât, us adhât hishtât satavaêsô raêvå hvarenanguhå zrayanghat haca vourukashât,
âat tat dunmãn hãm-hishteñti
us hiñdavat paiti garôit ýô hishtaite maidhim zrayanghô vourukashahe.

33.

âat tat dunmãn frashâupayeiti
maêkhô-kara ashavanô
frâ pourvô vâtãm vazaiti ýãm pathô âiti haomô frâshmish frâdat- gaêthô,
athra pascaêta vazaite
vâtô darshish mazdadhâtô
vâremca maêkhemca fyanghumca
avi aså avi shôithrå
avi karshvãn ýâish hapta.

34.

apãm napåse-tå âpô spitama zarathushtra anguhe astvaite shôithrô-baxtå vî-baxshaiti vâtasca ýô darshish awzhdâtemca hvarenô ashaonãmca fravashayô.
ahe raya ... tåscâ ýazamaide (See verse 3)!

[7]

35.

tishtrîm stârem raêvañtem hvarenanguhañtem ýazamaide
ýô avadhât fravazâite
xshôithnyât hish ushayât
dûraêurvaêsem paiti pañtãm
bakhô-baxtem paiti ýaonem
frathwarshtem paiti âfeñtem
zaoshâi ahurahe mazdå
zaoshâi ameshanãm speñtanãm.
ahe raya ... tåscâ ýazamaide (See verse 3)!

[8]

36.

tishtrîm stârem raêvañtem hvarenanguhañtem ýazamaide
ýim ýâre-carshô mashyehe
ahuraca xratugûtô
aurunaca gairishâcô
sizhdraca ravascarâtô
uzyôreñtem hispôseñtem
huyâiryâca dainghave
uzjaseñtem duzhyâiryâca,
kadha airyå dainghâvô
huyâiryå bavåñti.
ahe raya ... tåscâ ýazamaide (See verse 3)!

[9]

37.

tishtrîm stârem raêvañtem hvarenanguhañtem ýazamaide
âsu-xshvaêwem xshviwi-vâzem
ýô avavat xshvaêwô vazaite
avi zrayô vourukashem
ýatha tikhrish mainyavaså
ýim anghat erexshô xshviwi-ishush
xshviwi-ishvatemô airyanãm
airyô-xshuthat haca garôit
hvanvañtem avi gairîm.

38.

avi dim ahurô mazdå
avãn ameshå speñta
vouru-gaoyaoitish hê mithrô
pouru pañtãm fracaêshaêtem
â-dim paskât anumarezatem
ashishca vanguhi berezaiti
pâreñdica raoratha
vîspem-â ahmât ýat aêm
paiti-apayat vazemnô
hvanvañtem avi gairîm
hvanvata paiti nirat.
ahe raya ... tåscâ ýazamaide (See verse 3)!

[10]

39.

tishtrîm stârem raêvañtem hvarenanguhañtem ýazamaide
ýô pairikå taurvayeiti
ýô pairikå titârayeiti
ýå uzånghat angrô mainyush
mamnûsh stârãm afshcithranãm
vîspanãm paiti-eretêe.

40.

tå tishtryô taurvayeiti vîvâiti hish zrayanghat haca vourukashât,
âat maêkha us-fravåñte
huyâiryå âpô bareñtish
ýâhva urvâitish awrå
perethu aipi vîjasâitîsh
avô urvaitîsh hapta karshvãn.
ahe raya ... tåscâ ýazamaide (See verse 3)!

[11]

41.

tishtrîm stârem raêvañtem hvarenanguhañtem ýazamaide
ýim âpô paitishmareñte aremaêshtå frâtat-caratasca xãyå thraotô- stâtasca parshuyå vairyåsca,

42.

kadha-nô avi vyarât
tishtryô raêvå hvarenanguhå
kadha xå aspô-staoyehîsh
apãm khzhârãm aiwikhzhârem
srîråsca asô-shôithråsca
gaoyaoitîshca âtaciñtîsh
â-vareshajish urvaranãm
sûra vaxshyeñte vaxsha.
ahe raya ... tåscâ ýazamaide (See verse 3)!

[12]

43.

tishtrîm stârem raêvañtem hvarenanguhañtem ýazamaide
ýô vîspâish naênizhaiti simå
apaya vazhedrish uxshyeiti vîspåse-tå dâmãn baêshazyatica sevishtô
ýezi aêm bavaiti ýashtô
xshnûtô frithô paiti-zañtô.
ahe raya ... tåscâ ýazamaide (See verse 3)!

[13]

44.

tishtrîm stârem raêvañtem hvarenanguhañtem ýazamaide
ýim ratûm paiti-daêmca
vîspaêshãm stârãm
fradathat ahurô mazdå
ýatha narãm zarathushtrem,
ýim nôit merekheñte angrô mainyush
nôit ýâtavô pairikåsca
nôit ýâtavô mashyânãm
naêdha vîspe hathra daêva
mahrkathâi upadarzhnvaiñti.
ahe raya ... tåscâ ýazamaide (See verse 3)!

[14]

45.

tishtrîm stârem raêvañtem hvarenanguhañtem ýazamaide
ýahmâi hazangrem ýaoxshtinãm
fradathat ahurô mazdå
afshcithraêshva sevishtâi ýô afshcithraêibyô âiti raoxshnushva vazemnô.

46.

hô zrayanghô vourukashahe
amavatô huraodhahe
jafrahe uruyâpahe
vîspê vairish âcaraiti
vîspêsca srîrê nimraokê
vîspêsca srîrê apakhzhâire
aspahe kehrpa aurushahe
srîrahe zairi-gaoshahe
zaranyô-aiwidhânahe.

47.

âat âpô ava-bareñte spitama zarathushtra
zrayanghadha haca vourukashât
tâtå urvâthrå baêshazyå
tå avadha vîbaxshaiti
âbyô dainghubyô sevishtô
ýatha aêm bavaiti ýashtô
xshnûtô frithô paiti-zañtô.
ahe raya ... tåscâ ýazamaide (See verse 3)!

[15]

48.

tishtrîm stârem raêvañtem hvarenanguhañtem ýazamaide
ýim vîspâish paitishmareñte
ýâish speñtahe mainyêush dâmãn adhairi-zemâishca upairi-zemâishca ýâca upâpa ýâca upasma ýâca frapterejãn ýâca ravascarãn ýâca upairi tå akarana anakhra ashaonô stish âidhi.
ahe raya ... tåscâ ýazamaide (See verse 3)!

[16]

49.

tishtrîm stârem raêvañtem hvarenanguhañtem ýazamaide
thamananguhañtem varecanguhañtem
ýaoxshtivañtem xshayamnem
isânem hazangrâi ayaptanãm
ýô dadhâiti kuxshnvãnâi
paurush ayaptå jaidhyañtâi
ajaidhyamnâi mashyâi.

50.

azem dadhãm spitama zarathushtra
aom stârem ýim tishtrîm
avåñtem ýesnyata
avåñtem vahmyata
avåñtem xshnaothwata
avåñtem frasastata
ýatha mãmcit ýim ahurem mazdãm.

51.

avainghâi pairikayâi paitishtâtayaêca paitiscaptayaêca paititaretayaêca paityaoget- tbaêshah'yâica ýâ duzhyâirya ýãm mashyâka avi duzhvacanghô huyâiryãm nãma aojaite.

52-53.

ýedhi-zî azem nôit daidhyãm spitama zarathushtra aom stârem ýim tishtrîm ... (See verses 50-51) huyâiryãm nãma aojaite

54.

hamahe zî-mê idha ayãn hamayå vâ xshapô
xå pairika ýâ duzhyâirya
vîspahe anghêush astvatô
parôit pairithnem anghvãm ava-hisidhyât
âca paraca dvaraiti.

55.

tishtryô zî raêvå hvarenanguhå avãm pairikãm âdarezayeiti bibdâishca thribdâishca avanemnâishca vîspabdâishca mãnayen ahe
ýatha hazangrem narãm
ôim narem âdarezayôit
ýôi hyãn asti aojangha aojishta.

56.

ýat zî spitama zarathushtra airyå dainghâvô tishtryehe raêvatô hvarenanguhatô aiwi-sacyâresh dâitîm ýasnemca vahmemca ýatha-hê asti dâityôtemô ýasnasca vahmasca ashât haca ýat vahishtât, nôit ithra airyå dainghâvô frãsh hyât haêna nôit vôikhna nôit pãma nôit kapastish nôit haênyô rathô nôit uzgereptô drafshô.

57.

paiti dim peresat zarathushtrô, kat zî asti ahura mazda tishtryehe raêvatô hvarenanguhatô dâityôtemô ýasnasca vahmasca ashât haca ýat vahishtât.

58.

âat mraot ahurô mazdå, zaothrå hê uzbârayen airyå dainghâvô baresma hê sterenayen airyå dainghâvô pasûm hê pacayen airyå dainghâvô aurushem vâ vohu- gaonem vâ kâcit vâ gaonanãm hamô-gaonem.

59.

mâ-hê mairyô geurvayôit mâ jahika mâ ashâvô asrâvayat-gâthô ahumerexsh paityârenô imãm daênãm ýãm âhûirîm zarathushtrîm.

60.

ýezi-shê mairyô geurvayât jahika vâ ashâvô vâ asrâvayat-gâthô ahumerexsh paityârenô imãm daênãm ýãm âhûirîm zarathushtrîm
para baêshaza hacaite
tishtryô raêvå hvarenanguhå.

61.

hamatha airyâbyô dainghubyô vôikhnå jasåñti, hamatha airyâbyô dainghubyô haêna frapatåñti,
hamatha airyâbyô dainghubyô janyåñti pañcasakhnâi satakhnâishca satakhnâi hazangrakhnâishca hazangrakhnâi baêvarekhnâishca baêvarekhnâi ahãxshtakhnâishca.
ahe raya ... tåscâ ýazamaide (See verse 3)!

62.

ýathâ ahû vairyô...(2).
ýasnemca vahmemca aojasca zavareca âfrînâmi
tishtryehe stârô raêvatô hvarenanguhatô satavaêsahe frâpahe sûrahe mazdadhâtahe.
ashem vohû....
ahmâi raêshca ... hazangrem ... jasa-mê ... (kerba mazhd...) atha jamyât ýatha âfrînâmi.
ashem vohû...!!